Газета «Звезда» о нас и наших подопечных…

Падыходзьце, глядзіце на кацяня і сабачак! Выберыце сабе вернага сябра!

Кожную суботу і нядзелю на Віленскім рынку ў Магілёве з'яўляецца стэнд таварыства аховы жывёл "Добрае сэрца". Маладыя людзі прапануюць забраць жывёл абсалютна бясплатна. Каты і сабакі чыстыя і здаровыя: іх падабралі, вылечылі і прывялі ў парадак актывісты арганізацыі.

Вялікімі аматарамі жывёл звычайна падаюцца адзінокія бабулі, якія падкормліваюць у дварах дамоў цэлыя арміі бяздомных катоў і сабак. Напэўна, прыйшоў іншы час, а з ім і новая генерацыя актывістаў аховы жывёл. Усе яны маладыя, прыгожыя, модныя, інтэграваныя ў актуальныя сацыяльныя сеткі і маюць упэўненасць у тым, што дабрыня (а не грашовыя знакі і матэрыяльныя здабыткі) уратуе свет.

Аксане Мурынай 33 гады, яна працуе гандлёвым агентам і вучыцца на дызайнера інтэр'ераў. Прыйшла на рынак разам з 3-гадовай дачкой Любай, якая, як і маці, вельмі любіць жывёл. Цяпер, у дачны перыяд, у іх жывуць 6 сабак і 3 каты — свае і чужыя змяшаліся ў адну вялікую сям'ю.

У добрыя ручкі! — звяртаецца да прахожых людзей тонкім галаском малая Люба.

Звычайна да жывёл першымі цягнуцца дзеці. Яны не могуць адарвацца ад кошыка, дзе капошацца рознакаляровыя прыгожанькія кацяняты. За імі прыглядае Алена Механікава — студэнтка мінскага ўніверсітэта, будучы сацыёлаг. Свае канікулы яна праводзіць з карысцю, і ў "пакет" уваходзіць удзел у акцыях абаронцаў жывёл.

— Вось дапамагаю раздаваць гэтых прыгажуноў! — усміхаецца дзяўчына.

Першым новага гаспадара знайшло маленечкае карычневае, у тыгрыныя палоскі, кацяня. Яно адразу ж прычапляецца мініяцюрнымі кіпцюрамі да курткі рашучага мужчыны і спрабуе тыцкацца носам у яго шыю.

Міхаіл крыху саромеецца грамадскай увагі і імкнецца як мага хутчэй збегчы з новым гадаванцам. Але ўсе заўважаюць, што мужчына набыў на рынку яшчэ і дзіцячую каляску.

— Так, у мяне хутка народзіцца сын і будзе Арсеніем, а гэтае стварэнне будзем зваць Жорыкам, — гаворыць ён. — Няхай жывёлка бегае па хаце, жонка мяне падтрымала.

Мужчына і сабака

Днямі ў інтэрнэце першыя радкі ў папулярнасці, паміж палітычнымі і спартыўнымі падзеямі ды скандаламі ў асабістым жыцці і моднымі строямі "селебрыці", заняў сціплы фотаздымак, зроблены ў Амерыцы. На ім мужчына сярэдніх гадоў у вадзе ўкалыхвае сабаку.

Гісторыя шчымлівая: старая жывёліна, якая пакутуе на хранічныя болі ў суставах, адчувае палёгку і засынае, калі гаспадар заносіць яе у цёплае возера і калыша на лёгкіх хвалях.

Фотаздымак крануў тысячы сэрцаў ва ўсім свеце, і справа не толькі ў тым, што ён атрымаў некалькі соцень тысяч "лайкаў", а ў тым, што ён нагадаў пра міласэрнасць і любоў людзям, якіх штодня засмоктвае грамадства спажывання.

Сямейныя каштоўнасці для дварняка"Значыць, наш свет не зусім прапашчы," — трапны каментарый. А яшчэ адна жанчына спыталася: "Дзе знайсці такога мужа?" Цікава, што гаспадар сабакі прызнаўся: калі 19 гадоў таму ён развітаўся з каханай і быў у адчаі, то шчаня і клопат пра яго выратавалі яго ад самагубства. "Цяпер я проста хачу аддзячыць яму", — сказаў 49-гадовы мужчына.

Актывісты сабралі грошы на лячэнне сабакі, а каментарыі ў інтэрнэце ўвогуле можна чытаць як кнігу: жанчыны плачуць, мужчыны выказваюць павагу, і ўсе сталі ўзгадваць гісторыі, калі чалавечая дабрыня ратавала няшчасных жывёл.

Што ж, самы час для неабыякавых людзей перайсці з віртуальнага свету спачування ў рэальны і дзейсны. Палюбіце жывёл не ў інтэрнэце, а ў жыцці. Магілёўскае таварыства аховы жывёл "Добрае сэрца" запрашае.

Добрыя рукі

— Нам важная нават самая маленькая дапамога, — кажа актывістка таварыства Вольга Парфёнава.

Яна, маладая выкладчыца англійскай мовы, зусім не бачыць ніякага ўрону для свайго сацыяльнага статусу ад таго, што стаіць каля рынка з сабакам на руках.

— Усё маё дзяцінства прайшло ў клопатах пра бяздомных жывёл: цягнула дадому ўсё новыя "жывыя падарункі" з вуліцы, — усміхаецца Вольга.

Аднойчы дзяўчына ўбачыла людзей з таварыства абароны жывёл на рынку, падышла і пазнаёмілася.

— Я ніколі не сутыкалася з асуджэннем — хутчэй, наадварот! Сябры добра ставяцца да маёй працы і нават грошы перадаюць, якія патрэбны нам на лячэнне і стэрылізацыю жывёл. Многія перайшлі, як жартуюць, "з ценю на наш светлы бок". У людзей добрыя сэрцы, але ўсё ж у таварыстве нам хранічна не хапае добрых рук памочнікаў.

У Магілёве няма афіцыйнага прытулку для жывёл, а толькі часовы пункт утрымання спецаўтапрадпрыемства. Усе ведаюць правіла: калі не знайшоўся гаспадар — жывёлу ўсыпляюць. У такіх выпадках актывісты шукаюць часовы дом для няшчаснага ката ці сабакі, а пасля рэабілітацыі — новага надзейнага гаспадара для жывёлы.

— Нам вельмі не хапае людзей, якія б маглі даць катам і сабакам часовы прытулак, — расказвае Аксана. — Лячэнне і прышчэпкі робяцца за кошт ахвяраванняў. Усе даюць колькі могуць, але ёсць і значныя грашовыя ўнёскі, па сотні тысяч рублёў і нават больш. Аднойчы нейкі чалавек пералічыў на наш рахунак вельмі значную суму, але мы не ведаем яго імя: ён вырашыў любіць жывёл ананімна.

Між тым, прытулак у маладой пары знайшло сімпатычнае чорнае шчаня, якое трымае на руках 17-гадовая Віялета Пачына. Яе маці працуе ў аўтарамонтнай майстэрні і там падабрала 5 безгаспадарных шчанятак.

— Гэта адначасова і слёзы радасці за выратаваных жывёл, але і хваляванні, каб усё было добра, бо насамрэч мы не ведаем, каму аддаём, ці сапраўды ў добрыя рукі, бо ў нас тут толькі "фэйс-кантроль", — паведамляе дзяўчына.

Для таго, каб жывёла зноў не трапіла не небяспечную вуліцу, валанцёры тэлефануюць новым гаспадарам і пытаюцца пра жыццё і здароўе гадаванцаў.

Плямістая гуманнасць

Народ часам гаворыць (і даволі злосна), што дапамагаць трэба найперш людзям, якія трапілі ў бяду, бо такіх шмат вакол нас. А ўжо потым толькі брацца за праблемы жывёл.

— Справа ў тым, што ў абсалютнай большасці выпадкаў чалавек можа дапамагчы сабе сам — нават тым, што звернецца па дапамогу, — гаворыць Вольга. — Жывёла гэтага зрабіць не можа.

Сямейныя каштоўнасці для дварняка— Каты і сабакі аказваюцца на вуліцы з-за людзей, — кажа Віялета. — І нехта ж ім павінен дапамагчы: калі не я, то хто?

— Яна неяк ідзе плямамі! — менавіта так шчыра ацэньвае гуманнасць нашага грамадства, якая вызначаецца па стаўленні да жывёл, валанцёр Аксана. — Людзі часта любяць жывёл не столькі на словах, колькі "тэарэтычна". А трэба пакарміць, выратаваць ад жорсткасці, знайсці прытулак, падараваць жыццё, у рэшце рэшт.

Дзяўчаты няспынна расказваюць гісторыі пра жывёл, якіх падабралі — параненых і хворых. Яны, што і казаць, робяць уражанне, кранаюць душу.

Гісторыя сабакі Лучыка — шчаслівая. Хоць, калі моцна параненага сабаку знайшлі на тэрыторыі прамысловага прадпрыемства, не верылася, што ён выжыве. Але жывёлка пайшла на папраўку і нядаўна знайшла добрых гаспадароў: на сайце выкладзены фота шчаслівага любімчыка Лучы і яго "бацькоў".

Ёсць і цяжкія выпадкі. Лакі вельмі доўга лячылі ад складанай хваробы, а цяпер яму шукаюць дом, дзе б сабака мог вольна гуляць. Але самае галоўнае для Лакі — гэта клапатлівыя, спагадлівыя людзі побач.

Для сабакі Марціна, у якога пералом сцягна, валанцёры шукаюць хоць бы часовы прытулак, што дазволіла б паспяхова завяршыць лячэнне, якое пакуль праходзіць у "ваенна-палявых" умовах.

Белага знайшлі з ранай проста на вуліцы, і да няшчаснага сабакі нікому не было справы, пакуль не ўмяшалася адна дзяўчына. Пасля выратавальнай аперацыі і лячэння з Белага, спадзяюцца валанцёры, атрымаецца добры вартаўнік.

Храмы на адну лапу белы кот Саша дастойны асаблівага гаспадара, які не спужаецца, што кот — інвалід, а будзе любіць яго такім, які ён ёсць. Гэта, зрэшты, самае галоўнае.

Кантакт ёсць

Таварыства "Добрае сэрца" карыстаецца ўсім магчымымі метадамі, каб дапамагчы бяздомным і хворым жывёлам. Лістоўкі, аб'явы, зборы ахвяраванняў у крамах і акцыі ў грамадскіх месцах — гэтага ўжо мала. Абаронцы жывёл актыўна захопліваюць інтэрнэт-прастору — сацыяльныя сеткі і папулярныя сайты. І менавіта электронныя аб'явы даюць найбольш плёну, а група таварыства "У кантакце" перасягнула за 3 тысячы ўдзельнікаў.

Праект "Знайдзі сабе сябра" знайшоў месца на гарадскім партале. Гэта не проста заклікі міласэрна ставіцца да жывёл і просьбы аб ахвяраваннях. Гэта канкрэтны спіс катоў і сабак, якіх актывісты таварыства падабралі, вылечылі, а цяпер шукаюць для гадаванцаў добрых гаспадароў. Для кожнай жывёлы — шчымлівы фотаздымак, дасціпны расповед і кантактныя тэлефоны для тых, хто зацікавіўся.

Самая новая акцыя — фотаконкурс "Рука дапамогі". Тэма — бяздомныя жывёлы. Менавіта такім чынам, выкарыстоўваючы новую забаву моладзі фатаграфаваць усё і ўсюды, арганізацыя вырашыла прыцягнуць увагу грамадства да праблемы братоў меншых. Любы фотааматар можа сфатаграфаваць кінутых жывёл. Усе здымкі з'явяцца на сайце таварыства, а лепшыя — на восеньскай выставе.

На сайце dsmоgіlеv.bу, акрамя абвестак і фота, ёсць канкрэтныя справаздачы. За ліпень таварыству "Добрае сэрца" удалося знайсці новыя дамы і гаспадароў для 54 кінутых і бяздомных катоў і сабак.

Авторство статьи «Звязда»

Опубликовано в О нас в СМИ Метки: , ,

Добавить комментарий

Наш Форум

Вход

Система "Расчет (ЕРИП) —> Общественные объединения —> Защита животных —> Могилевское общ. защ. животных
Код услуги в ЕРИП 7437676

Наши банковские реквизиты

р/с в бел. рублях - BY19AKBB31350558402317000000
получатель платежа – ОО «МОЗЖ» Филиал № 700 - Могилевское областное управление ОАО «АСБ Беларусбанк»
код AKBB21700
УНП 790381041

Вещание форума

No items.

Случайное фото

Опрос

Общаетесь ли вы на нашем форуме?

Результаты голосования

Загрузка ... Загрузка ...

Свежие комментарии

Посетители сайта

7 посетителей на сайте
Посетители: 7 гостя

Информ-друзья

Система Orphus